Bild zeigt Getränkeuntersetzer zu: Gibt´s vom Islam verschiedene Sorde? Bild; Orient-Netzwerk e.V.Gibt’s vom Islam verschiedene Sorde?

 

De Wochemakkt in Hanau uffm Makktplatz is immer en Besuch wert! Und wieviele Leut‘ trifft mer da, Einheimische, Eigeplackte, Fremde. Und wenn mer, wie  de Kalle, en aal  Bischemer is – wie viele Bekannte!
Aber da sieht er aach Weiwer, die er net kennt, die durch ihre schwarze Klamotte und Koppdüscher uffalle: Nonne? Naa, des sinn kaa Nonne. Und er erinnert sich an die Bilder aus de Glotzkist: des sinn Weiwer, die der Relischion des Islam aagehör’n und des durch ihrne Klamotte aach zeische! Jetzt muss de Kalle üwwerleesche. In seiner Nachberschaft gibt`s doch aach Muslime, und die hawwe net so Klamotte aa. Und in Dernem, da gibt’s doch aach die Moschee – so heißt ja dene ihr Kersch.
Einmal war de Kalle dort in de Nachberschaft beieme Straaßefest. Und die Leut‘ war’n ferschterlich nett, e mords Gastfreundschaft! Awwer die Weiwer da hatte kaa schwarze Klamotte aa, sie hatte wohl aach e Koppduch uff, awwer schwarze Klamotte- naa, des net!
Und da fraacht de Kalle sei aal Klassekameradin,  es Mariesche. Die verzehlt em, dass de Islam e groß‘ Relischion is, die sehr vielfältisch is, die ganz unnerschiedlich aussehe kann und je nach Glauwensrischtung verschiedene Reeschele kennt, wie annern große Relischione aach. Mer derf also net von einzelne Begeeschnunge uff alle annern Muslime, also uff alle Oohänger des Islam schließe! Un schon üwwerhaupt gar net, wenn im Fernseh oder in de Zeidung üwwer Politik in islamische Länder berichtet werd!
Es is schon en grooße Unnerschied, wie de Islam in Saudi-Arabien gelebt werd oder in Maroggo, bei de Türke, in Bosnien oder bei de Perser. Allminnaner hawwe die gemeinsam den Glauwe an Gott, an Sei Wort in der heilischen Schrift des Islam, dem Koran, und an die Botschaft vom Mohammed. Des is dene ihr’n Prophet. Awwer wie de Koran zu verstehe is, da sinnse sich net all einisch: Die aane leesche ihn sehr streng aus, die annern e bissi lockerer. Un dann gibt’s noch die große unnerschiedliche Richtunge: de sunnitische un de schiitische Islam. Nach dem leewe vor allem die Perser.
Es gibt also noch allerhand zu lerne, wenn de Kalle de Islam kennelerne will! Und will ja doch de Islaam kennelerne, denn es gibt en ganze Haufe freundlische Muslime in Maintal, die hier leewe und die von de Kultur und de Kunst des Islam verzähle.
Un manche babbele sogar schon Hessisch!

 

Weitere Fragen zum Islam:

De Mohammed – was war denn des eichendlich für aaner?

Derfe die Fußballer im Ramadan garnix esse?

Wie is des bei de Muslime mittem Wuzzeflaasch?

Woher komme dann all die Muslime, die wo hier in Hessen leewe?

Weihnachte. Gibt´s des aach im Islam?

Wie is des mit dem Koppduch?

Was wird in so ´ner Moschee eichendlich gemacht?

Wer odder was is dann so en Imam / e Imamin?

Wie hawwes die Moslems mittem Äppelwoi?